Lời bài hát: Davide Van De Sfroos. Il Reduce.

Specia un attim a cascia via'l suu
e a lassamm de par me cun l'umbriia
in soel muur la tua cruus par che dunda
quand che pizzi 'l camen
La pultrona cugnuss el me pees
ma a sfundala l'e questa memoria
che l'e scia cul so fiaa de zampogna
per mea famm durmi
e se vardi sto guantu de pell
cun suta un pugn faa de legn
se dumandi se la man che ho perduu
l'e dree ama a spara
O forsi l'e sta'l to regaal
strepamm via quela man sciagurada
che pregava per mea fass cupa
e sparava sparava sparava
a oltra geent che sparava
e sparava sparava sparava
a oltra geent che pregava

Eri mai cupaa gnaa un fasan
e ho trataa sempru bee anca i furmiigh
serum in tanti carga in soe quel trenu
cume foej destacaa
e imparaum la geografia
nel cunta ogni siit che brusava
E la scendra de tuta l'Europa
ghe l'ho ancamo in buca
Per el viaggio de nozz cun la mort
hemm cataa foe Nikolajewka
e brindavum cul giazz e cul foec
e'l muson ne la palta
E la spusa vestida de negru
quanta geent l'ha purta in soel so altaar
e intaant che ghe davi la man
la girava la facia luntan
verso quei che basava
e pera la lassava'l so anell
a sto omm che turnava
La tua cruus la g'ha sempru tri cioo
e la mia uviameent voen in menu
ma son qui con la stessa preghiera
come ogni sera
te la scrivo col sangue non speso
e una penna nera.

(Grazie a Marco per questo testo)